የእስራኤል የውሃ ቴክኖሎጂ ልዑክ በኢትዮጵያ፦ በዲጂታል የውሃ አስተዳደር ዙሪያ ሰፊ ልምድ አካፈሉ፤ የኢትዮጵያውያን እንግዳ ተቀባይነትም አደነቁ

የእስራኤል የውሃ ቴክኖሎጂ ልዑክ በኢትዮጵያ፦ በዲጂታል የውሃ አስተዳደር ዙሪያ ሰፊ ልምድ አካፈሉ፤ የኢትዮጵያውያን እንግዳ ተቀባይነትም አደነቁ

አዲስ አበባ፣ጥቅምት 18/2019 ዓ.ም (ው.ኢ.ሚ)-በውሃና ኢነርጂ ሚኒስቴር አስተናጋጅነት በተካሄደው 3ኛው አገር አቀፍ የውሃና ኢነርጂ ሳምንት (የውሃ ቀን) መድረክ ላይ፣ የእስራኤሉ የውሃ ቴክኖሎጂ ኤክስፐርት እና የ«WaterEdge.IL» ዋና ስራ አስኪያጅ ራቪድ ሌቪ (Ravid Levy) በእስራኤል የላቁ የዲጂታል ውሃ አስተዳደር ቴክኖሎጂዎችና ስትራቴጂዎች ዙሪያ ሰፊ ገለጻ አቅርበዋል።

ባለሙያው በመድረኩ መጀመሪያ ላይ ለቀረበላቸው ደማቅ አቀባበል የተሰማቸውን ደስታ የገለጹ ሲሆን፣ “የኢትዮጵያ ህዝብ ያለው ልዩ እንግዳ ተቀባይነት፣ ፍቅርና አክብሮት እጅግ የሚደንቅ ነው” በማለት ለሀገሪቱ ባህል ያላቸውን ከፍተኛ አድናቆት ገልጸዋል።

ራቪድ ሌቪ በማብራሪያቸው ካነሷቸው ዋና ዋና ነጥቦች መካከል አንዱ አርቴፊሻል ኢንተለጀንስ (AI) እና ሴንሰሮችን በመጠቀም መረጃን ከመሰብሰብ ጀምሮ አውቶማቲክ ውሳኔ እስከመስጠት ያለውን የአራት ደረጃዎች የዲጂታል ውሃ ኦፕሬሽን ሰንሰለት (4-Step Operational Chain) አስተዋውቀዋል። ይህ ተሞክሮ በከተሞች የሚታየውን የውሃ ስርጭት መቆራረጥ ለመቅረፍ እና በቧንቧ መስመሮች ላይ የሚባክነውን ንፁህ ውሃ በዲጂታል ቁጥጥር ለመቀነስ ከፍተኛ እገዛ እንደሚያደርግ ባለሙያው በስፋት አብራርተዋል።

በተጨማሪም በገሊላ ባህር (Sea of Galilee) ዙሪያ የምርምር ተቋማት፣ የቴክኖሎጂ ስታርትአፖች እና የመንግስት አካላት በጋራ የሚሰሩበትን የተቀናጀ የፈጠራ ስነ-ምህዳር አሰራር አቅርበዋል።

ይህም ለሚኒስቴር መስሪያ ቤቱ ከአጋር አካላት ጋር ይበልጥ በመቀናጀት፣ ለሀገሪቱ የውሃ ችግሮች የሀገር ውስጥ የቴክኖሎጂ መፍትሄዎችን በጋራ ለማፍለቅ እና የዘርፉን ተዋናዮች በአንድ ማዕቀፍ ለማስተሳሰር አርአያ የሚሆን ተሞክሮ እንደሚሆን ተመልክቷል።

ባለሙያው አክለውም የውሃ ጥራትን ያለምንም መዘግየት በቅጽበት (Real-time) ለመፈተሽ እና ማንኛውም ብክለት ሲከሰት ወዲያውኑ የቅድመ ማስጠንቀቂያ ምልክት የሚሰጡ የሴንሰር ቴክኖሎጂዎችን አብራርተዋል።

በዚህ ተግባርም ለኢንዱስትሪ እና ለግብርና ወሳኝ የሆኑ የውሃ አካላት ከፋብሪካዎችና ከሌሎች ምንጮች በሚለቀቁ ኬሚካሎች እንዳይበከሉ እና በህዝብ ጤና ላይ አደጋ እንዳይፈጥሩ አስቀድሞ ለመከላከል ከፍተኛ ጠቀሜታ እንዳለው አመልክተዋል።

በገለጻቸው ማጠቃለያ ላይ የውሃ መሠረተ ልማቶችን በክላውድ ቴሌሜትሪ እና በስካዳ (SCADA) ማዕከላዊ የትንታኔ መድረክ መቆጣጠር፣ እንዲሁም እነዚህን ወሳኝ መሠረተ ልማቶች ከሳይበር ጥቃት የመጠበቅን አስፈላጊነት በስፋት አንስተዋል።

ይህ ቴክኖሎጂ በግዙፍ የውሃና የሀይድሮ-ፓወር መሠረተ ልማቶች ዘመናዊ ቁጥጥር እንዲደረግባቸውና ከማንኛውም ዲጂታልም ሆነ አካላዊ የደህንነት ስጋቶች በተጠናከረ መንገድ ለመጠበቅ ወሳኝ መደላድል እንደሚፈጥር ያስረዳል።

ይህ በራቪድ ሌቪ የቀረበው የልምድ ልውውጥ፣ ኢትዮጵያ ያላትን ሰፊ የውሃ ሀብት በቴክኖሎጂ በመታገዝ ለምግብ ዋስትና (በተለይም ለተፋሰስ ልማትና መስኖ) እና ለንፁህ መጠጥ ውሃ አቅርቦት በብቃት እንድትጠቀምበት አቅጣጫ ጠቋሚ ሆኗል።

Share this Post